Aizawl khawpui enkawl nan vbc. 30 chuang tangkai takin kan hmang- AMC Mayor

by News Editor

Tualchhung News

ZORAM TODAY| Aizawl 19th June, 2024 (Wed): Vawiin khan Lalrinenga Sailo, AMC Ward No - XIX MNF Campaign Committee Chairman chuan AMC By-Election neihna tur Ward No - XIX huam chhunga Saikhamakawn leh Hlimen te a tlawh.

AMC Mayor Lalrinenga chuan,"Tun hnaiah ram pumah ZPM sawrkar an tlahniam zel a, midik apiangin ZPM an til san zel a. Thla nga chhung leka kan sawrkar hrawn mek kalphungah hian thilmak tak tak kan hmu zel a, mipuite kan beidawng tan hle a ni" a ti.

Rinenga Sailo chuan "Aizawl khawpui enkawl nan cheng vaibelchhe 30 chuang tangkai takin kan hmang a. Aizawl khawpui Local council 85 hnenah tangkai takin kan sem a, Local Council-te'n hna tha takin an thawk a ni tih hi mipuite kan hriattir duh a ni" a ti.

"MNF official Candidate Dr. Lalrinzuali Hrahsel kan thlang tling a nih chuan nasa taka kan tangkaipui dawn bakah Melthum leh Saikhamakawn tui harsatna ah tuizem lian tak kan siam dawn," a ti bawk.

AMC Mayor chuan, " MNF AMC chuan Ward-XIX huam chhunga ranvulh dan zangkhai zawk kan ngaihtuah dawn bawk a ni. MNF Official Candidate Dr. Lalrinzuali Hrahsel mi tha tak mai kan nei hi kan vannei em em a, a tlin ngei pawh ka beisei," tiin Ward mipuite chu an candidate thlang turin a ngen a ni.

Lalrinenga Sailo AMC Ward-XIX Campaign Committee Chairman hian vawiin vek khan Hlimen Relief camp tlawh bawkin, MNF thalai hruaitute'n an tawiawm a ni.